შარლ მარი გუსტავ ლე ბონი — ფრანგი ენციკლოპედისტი, რომლის ინტერესთა სფეროები მოიცავდა ფსიქოლოგიას, ანთროპოლოგიას, სოციოლოგიას, მედიცინას, ფიზიკას. ასევე იყო გამომგონებელიც. მისი ყველაზე მეტად ცნობილი ნაშრომია ბრბოს ფსიქოლოგია, შექმნილი 1895 წელს და მიჩნეული ბრბოს ფსიქოლოგიის საწყის ეტაპად. ლე ბონის შრომებს უდიდესი გავლენა ჰქონდათ ისეთ ფიგურებზე, როგორებიც იყვნენ თეოდორ რუზველტი, ბენიტო მუსოლინი, ლენინი, ადოლფ ჰიტლერი და სხვები. ლე ბონი დაიბადა საფრანგეთის პატარა ქალაქ ნოჟენ-ლე-როტრუში, ბრეტონელთა ოჯახში. სწავლობდა მედიცინას პარიზის უნივერსიტეტში, სადაც 1866 წელს დოქტორატი მიიღო. შექსპირის კითხვით ისწავლა ინგლისური და გერმანული ენები. მოგვიანებით იგი ფილოსოფიითა და ფსიქოლოგიით დაინტერესდა. 1890-იან წლებში ლე ბონი ბევრს მოგზაურობდა. სწორედ ამ პერიოდში ჩაეყარა საფუძველი მის თეორიას ბრბოს ფსიქოლოგიის შესახებ, რომელიც შეიძლება ასე განზოგადდეს: "ბრბო არ წარმოადგენს მის შემადგენელ ინდივიდთა ჯამს". იმავე პერიოდში მან ლაბორატორია ჩამოაყალიბა შინ, სადაც სხივებზე დაკვირვებას აწარმოებდა. მისმა შრომებმა იმდენად მიიქცია ყურადღება, რომ ის 1903 წელს ნობელის პრემიაზე იყო ნომინირებული ფიზიკის დარგში. გუსტავ ლე ბონი სიცოცხლის ბოლო დღემდე ინარჩუნებდა აქტივობას.