პოლ ოსტერი (ინგლ. Paul Auster; დ. 3 თებერვალი, 1947, ნიუარკი, აშშ) — ამერიკელი მწერალი. მისი ნაწარმოებებისთვის დამახასიათებელია აბსურდი, ეგზისტენციალიზმის საკითხები, პიროვნების იდენტობის ძიება. დაიბადა ქალაქ ნიუარკში (ნიუ-ჯერსის შტატი) 1947 წელს, დედამისის — კუინისა (ქალიშვილობის გვარი ბოგატი) და მამამისის — სემუელ ოსტერის ოჯახში. იგი პოლონური წარმოშობის ებრაელია, საშუალო ფენის წარმომადგენელი. იზრდებოდა ქალაქებში საუს-ორენჯსა და ნიუარკში. 1970 წელს კოლუმბიის უნივერსიტეტის დამთავრების შემდეგ საფრანგეთში გაემგზავრა. რაც შეეხება მწერლის ოჯახურ კავშირებს, მისი პირველი ცოლი ასევე მწერალი ლიდია დეივისი იყო. წყვილს ამ ქორწინებიდან ერთი ვაჟი, დანიელი ჰყავს. ოსტერის მეორე მეუღლე კი პროფესორ ლოიდ ჰუსტვედტის ქალიშვილი სირი ჰუსტვედტია, რომლებიც 1981 წელს დაქორწინდნენ. ამ ქორწინებიდან ოსტერსა და მის მეორე ცოლს ქალიშვილი, სახელად სოფი ჰყავთ. ის თავის მეუღლესთან, ლიდია დეივისთან ერთად თარგმნიდა ფრანგულ ლიტერატურას. მამის გარდაცვალების შემდეგ მემკვიდრეობით მიღებულმა ქონებამ საშუალება მისცა ოსტერს, თავი დაენებებინა თარგმანით თავის რჩენისთვის და თავისუფალ მწერლად ქცეულიყო. შეერთებულ შტატებში დაბრუნებულმა ოსტერმა გამოაქვეყნა პირველი წიგნი, „მარტოობის გამოგონება“ (1982), რომელიც სწორედ მამას მიუძღვნა და რომელიც პოლ ბენჯამენის ფსევდონიმით გამოუშვა. ოსტერს სახელი გაუთქვა 1987 წელს გამოქვეყნებულმა „ნიუ-იორკულმა ტრილოგიამ.“ რომანი სამი წიგნისგან შედგება: „შუშის ქალაქი”, „აჩრდილები” და „დაკეტილი ოთახი”. მას შემდეგ მწერალმა ათზე მეტი რომანი დაწერა, მათ შორის ცნობილი „მისნის ღამე“ და „ილუზიების წიგნი“ (2002). ქართულად ნათარგმნია „ნიუ-იორკული ტრილოგია“, „მისნის ღამე“, „ილუზიების წიგნი“ და პოლ ოსტერისა და ჯონ მაქსველ კუტზეეს მიმოწერა.