აჩუქე წიგნი, აჩუქე თავისუფლება

აჩუქე წიგნი, აჩუქე თავისუფლება – კომპანია „ბიბლუსმა“ წიგნის ჩუქების დღესთან დაკავშირებით მასშტაბური კამპანია დაიწყო

კომპანია „ბიბლუსმა“ წიგნის ჩუქების დღესთან დაკავშირებით მასშტაბური კამპანია დაიწყო – „აჩუქე წიგნი, აჩუქე თავისუფლება“. ინიციატივა მიზნად ისახავს განათლების მნიშვნელობის გაძლიერებას და წიგნის, როგორც პიროვნული განვითარების, შინაგანი თავისუფლების, ერთ-ერთ უმნიშვნელოვანეს ინსტრუმენტად აღიარებას.

23 აპრილი წიგნის ჩუქების დღედ UNESCO-მ 1995 წელს გამოაცხადა, ხოლო „ბიბლუსი“ 2019 წლიდან შეუერთდა ამ ტრადიციას და წლების განმავლობაში ჩამოაყალიბა, როგორც სოციალური აქტივობა, რომელშიც კერძო სექტორი აქტიურად ერთვება ყოველწლიურად, კერძოდ, კამპანიის ფარგლებში, შესყიდული წიგნები კომპანიებს გამოუყენებიათ სხვადასხვა აქტივობებისთვის: ბავშვთა სახლებში, სკოლებსა და მოხუცთა თავშესაფარში ბიბლიოთეკების მოწყობა, თანამშრომელთა დასაჩუქრება პიროვნული განვითარებისთვის და ა.შ. დღემდე კამპანიაში მონაწილეობა მიიღო ათეულობით კომპანიამ და ორგანიზაციამ, რომლებიც აქტიურად უჭერენ მხარს ხარისხიანი განათლების ხელმისაწვდომობასა და წიგნის კულტურის განვითარებას. ყოველწლიურად, მათი ჩართულობა კიდევ უფრო იზრდება, რაც ხაზს უსვამს ინიციატივის მნიშვნელობასა და მასშტაბურობას.

კამპანიის ფარგლებში, წელს „ბიბლუსმა“ გადაიღო ვიდეორგოლი, რომლის მთავარი გმირი არის მარო მაყაშვილი, წიგნიერებისა და თავისუფლების ერთ-ერთი ყველაზე მნიშვნელოვანი სიმბოლო, პირველი ქალი, რომელიც ქვეყნის ეროვნულ გმირად აღიარეს. მისი ჩანაწერები ხაზს უსვამს აზროვნების, განათლებისა და თვითგანვითარების როლს შინაგანი თავისუფლების მოპოვების გზაზე, სწორედ ამიტომ ყველაზე კარგად შეესაბამება სლოგანს – „აჩუქე წიგნი, აჩუქე თავისუფლება“.

აჩუქე წიგნის მასშტაბური კამპანიის ფარგლებში კომპანია „ბიბლუსმა“ დაიწყო ვლოგერების კონკურსიც, რომელშიც 16 წლიდან ზემოთ ნებისმიერ მსურველს შეუძლია მიიღოს მონაწილეობა. ამისათვის კონკურსანტმა უნდა ჩაწეროს 1-დან 3 წუთამდე ქრონომეტრაჟის ვიდეო, სადაც ისაუბრებს წიგნებზე, წიგნის ჩუქების მნიშვნელობაზე, კერძოდ, მოკლედ მიმოიხილოს სამი ყველაზე საყვარელი წიგნი და აღნიშნოს, ვის და რატომ აჩუქებდა თითოეულს. კონკურსის წესები და პირობები: https://bit.ly/4cBP065

ამრიგად, ინიციატივა, რომელიც „ბიბლუსმა“ 2019 წლიდან წამოიწყო, გადაიქცა ფართომასშტაბიან საზოგადოებრივ მოძრაობად და კომპანიები, ორგანიზაციები და ინდივიდუალური მონაწილეები გააერთიანა ერთი მიზნის – წიგნის პოპულარიზაციის, თვითგანვითარებისა და შინაგანი თავისუფლების, გარშემო.