ავტორის შესახებ
მარიამ წიკლაური (დ. 18 მარტი, 1960) — ქართველი პოეტი, საბავშვო მწერალი, მთარგმნელი, ლიტერატურული პრემია „გალას“ ლაურეატი.
მარიამ გურამის ასული წიკლაური დაიბადა თბილისში, საქართველოში 1960 წლის 18 მარტს.
1983 წელს დაამთავრა თბილისის სახელმწიფო უნივერსიტეტის (თსუ) ქიმიის ფაკულტეტი.
მუშაობდა პედაგოგად, სხვადასხვა გამომცემლობის რედაქტორად. რადიო „ივერიაში“ უძღვებოდა ორ საავტორო გადაცემას: „საუბრები საბავშვო ლიტერატურაზე“ და ლიტერატურული სალონი „ერთი საათი". კულტურის სამინისტროს პროექტის „ცოცხალი წიგნების“ კურატორად. არის საერთაშორისო საგნმანათლებლო-ლიტერატურული პროექტების და ლიტერატურული ფესტივალების მონაწილე.
მარიამ წიკლაური არის „საბავშვო ლიტერატურის განვითარების ფონდის - ლიბოს" ერთ-ერთი დამაარსებელი. ეს ფონდი გახდა „ასტრიდ ლინდგრენის საერთაშორისო პრემიის" 2009 წლის ნომინანტი. იგი ინიციატორია საქართველოში „ქართული საბავშვო წიგნის დღის - 27 ოქტომბრის" დაწესებისა. არის ამავე ფონდის ეგიდით გამომავალი საბავშვო ლიტერატურული ალმანახის რედაქტორი.
მარიამ წიკლაური არის ავტორი „ქართველი პოეტი ქალების“ ქართულ-ინგლისური ანთოლოგიისა, სადაც შესულია 32 ქართველი პოეტი ქალის ლექსები. ასევე არის გამომცემლობა „საუნჯის“ პროექტის „ბიბას“ („ბიბლიოთეკა ბავშვებისათვის“) ავტორი და ხელმძღვანელი.
მარიამ წიკლაურის ნაწარმოებები შესულია სხვადასხვა კრებულში, ანთოლოგიაში, სახელმძღვანელოში. მისი ლექსები, თარგმანები, წერილები, ესეები სისტემატურად ქვეყნდება ლიტერატურულ პერიოდიკაში. მისი ლექსები თარგმნილია ლიტვურ, ინგლისურ, გერმანულ, შვედურ, უკრაინულ, იტალიურ, რუსულ, სომხურ, ჩეხურ, სლოვაკურ, პოლონურ ენებზე.
თავადაც მრავალი მთარგმნელობითი პროექტის მონაწილეა. თარგმნილი აქვს: ბერძნული, ჩინური, ნორვეგიული, ლიტვური, რუსული, ინგლისური, პოლონური, უკრაინული პოეზიის არაერთი ნიმუში.
მარიამ წიკლაურის ლექსები შესულია 2011 წლის "მსოფლიო პოეზიის ალმანახში" (World Poetry Almanac 2011, 180 Poets from 100 Countries). ასევე თანამედროვე ქართული პოეზიის იტალიურ და უკრაინულ ანთოლოგიებში.
მარიამ წიკლაური ცხოვრობს თბილისში, ჰყავს მეუღლე და ორი შვილი.
