პროდუქციის ფილტრი - ბიბლუსი

ჯეკ ლონდონი

✔️ გაიცანით ჯონ გრიფიტ „ჯეკ“ ლონდონი — ამერიკელი მწერალი, ყველაზე უკეთ ცნობილი, როგორც სათავგადასავლო მოთხრობებისა და სოციალური რომანების ავტორი.
▪️პატარა ჯეკი დაწყებით კლასში რომ დადიოდა, თან გაზეთებს ყიდდა მეცადინეობის დაწყებამდე და სკოლის შემდეგ. ბევრს კითხულობდა, მაგრამ მხოლოდ სამკითხველოში, რადგან წიგნების შეძენა არ შეეძლო. ერთხანს კონსერვის ქარხანაში მუშაობდა, შემდეგ "ხამანწკების დამჭერი მეკობრე" გახდა და გაეცნო იმ ველურ და გაბედულ ცხოვრებას, რომელსაც ადრე მხოლოდ წიგნებით იცნობდა.
▪️თავისი პირველი მოთხრობა დაწერა სან-ფრანცისკოს გაზეთ "კოლის" მიერ გამოცხადებული კონკურსისათვის. ეს იყო "ტაიფუნი იაპონიის ნაპირთან", რომელმაც პირველი ჯილდო მიიღო, რამაც ავტორი დიდად წააქეზა. მაგრამ გაზეთმა მისი შემდეგი მოთხრობა აღარ მიიღო და ჯეკ ლონდონის ლიტერატურული მოღვაწეობა დროებით შეფერხდა.
▪️1894 წლის გაზაფხულზე წამოჭრილმა ეკონომიურმა კრიზისმა ჯეკ ლონდონი უმუშევარი გახადა. ცხოვრების სიძნელეებთან და რედაქციებთან მძიმე ბრძოლის შემდეგ დამშეულმა და გაწამებულმა ჯეკ ლონდონმა მაინც მიაღწია თავის მიზანს,-მწერალი გახდა.
▪️1899 წლის იანვარში სან-ფრანცისკოს ჟურნალმა "ოვერლენდ მანზლიმ" გამოაქვეყნა მისი პირველი ჩრდილოური მოთხრობა "მათთვის ვინც გზაშია". ამას მოჰყვა სხვა მოთხრობები, რომლებიც "ჩრდილოეთის ოდისეასთან" ერთად გამოიცა 1900 წელს ერთ კრებულად სახელწოდებით "მგლის შვილი". მალე ჯეკ ლონდონი სახელგანთქმული მწერალი გახდა.
▪️ ჯეკ ლონდონის ერთ-ერთ ყველაზე მნიშვნელოვან ნაწარმოებად ითვლება რომანი "მარტინ იდენი", სადაც თავი მოიყარა მწერლის ცხოვრების გამოცდილებამ, მისმა ნააზრევმა და განცდილმა, პირადმა და საზოგადოებრვმა. თვითონ ავტორსაც არ უარუყვია, რომ ამ რომანის გმირი მისი მსგავსებაა, მაგრამ რა თქმა უნდა იგი მეტად განზოგადებული და შემკრებლობითი ტიპია. "მარტინ იდენი" კრიტიკული რეალიზმის ერთ-ერთი საუკეთესო ნიმუშია
▪️უნივერსიტეტში სწავლის დროს ჯეკ ლონდონმა ახალგაზრდა ქალიშვილი მეიბლ ეპლგარტი გაიცნო, რომელიც ოკლენდის წარჩინებული ოჯახიდან იყო. მათ შორის არსებული სოციალური განსხვავების მიუხედავად, ჯეკსა და მეიბლს ერთმანეთი შეუყვარდათ. ერთი პერიოდი დანიშნულებიც კი იყვნენ, მაგრამ სოციალურმა განსხვავებამ ბოლოს მაინც იჩინა თავი და ისინი დაშორდნენ. მეიბლი აღარ გათხოვილა. სწორედ მეიბლი იქცა რუფის პროტოტიპად ჯეკ ლონდონის კიდევ ერთ ავტობიოგრაფიულ რომანში “Martin Eden-მარტინ იდენი”, რომელიც 1909წელს გამოქვეყნდა. მარტინ იდენსა და ჯეკ ლონდონს ბევრი საერთო აქვთ. ორივე დაბალი სოციალური წრიდან იყო გამოსული, ორივეს უყვარდა თავგადასავლები, წიგნები, თავის გასატანად ორივე ნებისმიერ სამუშაოზე თანხმდებოდა და ორივეს ერთი სურვილი ამოძრავებდათ, გამხდარიყვნენ ცნობილი მწერლები.
▪️ჯეკ ლონდონმა სოციალისტთა წრეში გაიცნო თავისი მეორე დიდი სიყვარული 17 წლის ანა შტრუნსკი. ის რუს-ებრაელთა ინტელექტუალური ოჯახიდან იყო გამოსული. მაგრამ… 1900 წელს მწერალმა ცოლად შეირთო პროფესიით მასწავლებელი ელიზაბეტ “ბესი” მადერნი, რომელსაც რამდენიმე თვით ადრე საქმრო დაეღუპა. ჯეკსა და ბეს ორი ქალიშვილი შეეძინათ ჯოანა და ბესი “ბეკი”. მათი ქორწინება მეგობრობას უფრო ეფუძნებოდა, ვიდრე სიყვარულს.
▪️მიუხედავად აღიარებისა, ლონდონი კვლავ განიცდიდა გაჭირვებას და ახლობელ ადამიანებთან ინტენსიური ურთიერთობის მიუხედავად, იგი კვლავ შინაგანად ჩაკეტილ და მარტოხელა კაცად რჩებოდა. ამას თან დაერთო ავადმყოფობაც. არსებობს მოსაზრება, რომ 1916 წლის 22 ნოემბერს, მან ნარკოტიკის გადაჭარბებული დოზის მიღებით თავი მოიკლა. მეორე ვერსიით, გლენ ელენში ჯეკ ლონდონის სახლ-მუზეუმში დაცულია ექიმების მიერ ხელმოწერილი გარდაცვალების ცნობა, რომლის თანახმადაც, გარდაცვალების წინა დღეს, მწერალმა თავი შეუძლოდ იგრძნო და გონება დაკარგა. ბოლო 6 წელი ჯეკ ლონდონს თირკმელების უკმარისობა აწუხებდა, რომელიც პელაგრას შედეგად განუვითარდა. გარდაცვალების მიზეზად სახელდება ურემია, რომელიც არასწორმა კვებამ და თირკმელების გათიშვამ გამოიწვია. მისი ანდერძის თანახმად მწერლის გვამს კრემაცია ჩაუტარდა.